ਗੁਰਦਵਾਰਾ ਸ਼ਹੀਦ ਗੰਜ ਬਾਬਾ ਦੀਪ ਸਿੰਘ ਵਿਖੇ ਅੱਜ ਬਿਜਲੀ ਦਾ ਸਰਕਟ ਸ਼ਾਟ ਹੋ ਜਾਣ ਕਾਰਨ ਪਰਕਰਮਾਂ ਵਿਚ ਲਗੀਆਂ ਚਾਨਣੀਆਂ ਨੂੰ ਅਚਾਨਕ ਅੱਗ ਲਗ ਗਈ। ਇਸ ਅੱਗਜਨੀ ਦੀ ਘਟਨਾਂ ਕਾਰਨ ਵਿਚ ਕਿਸੇ ਵੀ ਤਰਾਂ ਦਾ ਜਾਨੀ ਨੁਕਸਾਨ ਨਹੀ ਹੋਇਆ।ਅੱਜ ਦੁਪਿਹਰ ਸਮੇ ਗੁਰਦਵਾਰਾ ਸ਼ਹੀਦ ਗੰਜ ਬਾਬਾ ਦੀਪ ਸਿੰਘ ਵਿਖੇ ਪਰਕਰਮਾਂ ਵਿਚ ਸੰਗਤਾਂ ਦੀ ਸਹੂਲਤ ਲਈ ਧੁਪ ਤੋ ਬਚਾਅ ਲਈ ਲਗਾਈਆਂ ਚਾਨਣੀਆਂ ਨੂੰ ਅੱਗ ਲਗ ਗਈ। ਗਰਮੀ ਕਾਰਨ ਅੱਗ ਤੇਜੀ ਨਾਲ ਫੈਲ ਗਈ ਤੇ ਹਵਾ ਦੇਣ ਲਈ ਲੱਗੇ ਪੱਖੇ ਵੀ ਇਸ ਅੱਗ ਕਾਰਨ ਸੜ ਗਏ।ਅੱਗਜਨੀ ਦੀ ਘਟਨਾਂ ਦਾ ਪਤਾ ਲਗਦੇ ਸਾਰ ਹੀ ਗੁਰਦਵਾਰਾ ਸਾਹਿਬ ਦੇ ਮੈਨੇਜਰ ਸ੍ਰ ਜਤਿੰਦਰਪਾਲ ਸਿੰਘ ਮੌਕੇ ਤੇ ਪਹੁੰਚੇ ਤੇ ਉਨਾਂ ਸੰਗਤ ਦੇ ਸਹਿਯੋਗ ਨਾਲ ਅੱਗ ਤੇ ਕਾਬੂ ਪਾਇਆ। ਪੱਤਰਕਾਰਾਂ ਨੂੰ ਇਸ ਘਟਨਾਂ ਬਾਰੇ ਜਾਣਕਾਰੀ ਦਿੰਦੇ ਸ੍ਰ ਜਤਿੰਦਰਪਾਲ ਸਿੰਘ ਨੇ ਦਸਿਆ ਕਿ ਅੱਗ ਕਾਰਨ ਤਿੰਨ ਚਾਨਣੀਆਂ ਸੜ ਗਈਆਂ ਤੇ ਨਾਲ ਹੀ 6 ਦੇ ਕਰੀਬ ਪੱਖੇ ਵੀ ਸੜ ਗਏ ਹਨ। ਅੱਗ ਕਾਰਨ ਗੇਟ ਦਾ ਕੁਝ ਹਿੱਸਾ ਧੁਆਖਿਆ ਗਿਆ ਸੀ ਜਿਸ ਨੂੰ ਮੁੜ ਰੰਗ ਕਰਵਾ ਦਿੱਤਾ ਗਿਆ ਹੈ।ਅੱਗ ਕਾਰਨ ਸੜੀਆਂ ਚਾਨਣੀਆਂ ਤੇ ਪੱਖਿਆ ਨੂੰ ਵੀ ਮੌਕੇ ਤੇ ਹੀ ਬਦਲ ਦਿੱਤਾ ਗਿਆ ਹੈ। ਸ੍ਰ ਜਤਿੰਦਰਪਾਲ ਸਿੰਘ ਨੇ ਦਸਿਆ ਕਿ ਅਸੀ ਜਿਲਾ ਪ੍ਰਸ਼ਾਸ਼ਨ ਨੂੰ ਪੱਤਰ ਲਿਖ ਕੇ ਇਕ ਮੈਡੀਕਲ ਟੀਮ ਤੇ ਇਕ ਅੱਗ ਬੁਝਾਂਉ ਇੰਜਨ ਗੁਰਦਵਾਰਾ ਸਾਹਿਬ ਦੇ ਨੇੜੇ ਹੀ ਪੱਕਾ ਰਖਣ ਲਈ ਵੀ ਮੰਗ ਕੀਤੀ ਹੈ।ਦਸਣਯੋਗ ਹੈ ਕਿ ਗੁਰਦਵਾਰਾ ਸ਼ਹੀਦ ਗੰਜ ਸਾਹਿਬ ਵਿਖ ਹੀ ਬੀਤੇ ਐਤਵਾਰ ਨੂੰ ਚੋਪਹਿਰੇ ਦੀ ਸੰਗਤ ਦੇ ਰਸ਼ ਕਾਰਨ ਨਿਰਮਾਣ ਅਧੀਨ ਲੰਗਰ ਹਾਲ ਦੇ ਲੈਂਟਰ ਦੀਆਂ ਪਲੇਟਾਂ ਡਿੱਗ ਜਾਣ ਕਾਰਨ ਦੋ ਔਰਤਾਂ ਦੀ ਮੌਕੇ ਤੇ ਹੀ ਮੌਤ ਹੋ ਗਈ ਸੀ ਤੇ 8 ਔਰਤਾਂ ਜ਼ਖਮੀ ਹੋਈਆਂ ਸਨ।